සන්නිවේදනයේ සුන්දරත්වය

 සංස්කෘතික මානව විද්‍යාව තුළ මිනිසාගේ සිතුවිලි, ආත්මීය, අධි මානසික, ආගමික හා විනෝදාස්වාදී... යන ක්‍රියාකාරකම් දැකිය හැකිය. මානව සමාජය සතු මෙම ක්‍රියාදාමයන් ඔස්සේ සුන්දරත්වය නිර්මාණය වෙයි. සෞන්දර්ය හෙවත් සුන්දරත්වය තුළ සංස්කෘතික සාධකයන්හි බලපෑම ඉතා ප්‍රබලය. 

සුන්දරත්වය යන්නට ඉංග්‍රීසි භාෂාවෙන් "Aesthetic "  සහ " Beauty " යන  පදයන් භාවිතා කරන අතර වාග් විද්වතුන්ගේ අදහස වනුයේ ඉහත පද දෙකෙන්  සමාන අර්ථ සේම එක් යෙදුමකින් හැඟවෙන  අර්ථය අභිබවමින් අනෙක් පදයෙන් අර්ථය  ඉස්මතු කරන බවයි.

සන්නිවේදනය අරමුණු අතර තොරතුරු සම්පාදනය, අධ්‍යාපනය, පෙළබවීම හා විනෝදාස්වාදය ප්‍රමුඛ වේ. මේ අනුව ජන සන්නිවේදන සිද්ධාන්තයක් ලෙස සැලකෙන විනෝදාස්වාදී න්‍යායන් හි පදනම වනුයේ සුන්දරත්වය හා සෞන්දර්යයයි. 

ආනන්ද කුමාරස්වාමි පවසන ආකාරයට සුන්දරත්වය යනු තත්ත්වයකි. එලෙසම නොබෙල් සම්මානලාභී ඇලෙක්සැන්ඩර් සෝල්සනිට්සින් ට අනුව සුන්දරත්වය මඟින් ලොව රැක දෙන බවයි. සුන්දරත්වය වූ කලී දාර්ශනික සංකල්පයකි. එය ගැඹුරුතම සන්නිවේදන ක්‍රියාවලියක මූලික හරය වන්නේය. 

සන්නිවේදන කාර්යයක් වන තොරතුරු සම්පාදනයෙන් ඔබ්බට ගිය අදහසක් සුන්දරත්වය තුළ පවතියි. එය වූ කලී භෞතික වශයෙන් තොරතුරු සම්පාදන මට්ටම ඉක්මවා ගිය අවස්ථාවකි. එබැවින් එය සන්නිවේදන දර්ශනයක් වන්නේ ය. 

කුමන මාධ්‍යයක් පදනම් කරගෙන වුවද නිර්මාණය වන සන්දේශය තුළ සුන්දරත්වය අන්තර්ගත කළ හැක. උදාහරණ ලෙස ගත් විට  පුවත්පත, ගුවන්විදුලිය, රූපවාහිනිය, සිනමාව හා නව මාධ්‍ය තුළ අප නිර්මාණය කරන සන්දේශය සුන්දරත්වයකින් යුතු සන්දේශයන් බවට පත් කිරීමට අපි උත්සාහ කළ යුතු වෙමු. එවිට ග්‍රාහකයාගේ සංජානනය සහ විචාරශීලිත්වය ද වර්ධනය වන බව නොඅනුමානය. 

සියලු කලාවන් තුළ සුන්දරත්වය ඇත්තේ ය. සෞන්දර්යයේදී සිදු කරනුයේ කලාත්මක නිර්මාණ ලස්සන හෝ අවලස්සන ලෙස දැක්වීමයි. කලාත්මක නිර්මාණයක් එසේ දැක්වීම සඳහා යොදා ගත හැකි නිශ්චිත මිනුම් දඩු ⁣තිබේද? කලාත්මක නිර්මාණයක් අගය කරනුයේ කුමන පදනමක් මතද? "ලස්සන " යන්න පුද්ගලයාගේ මනස විසින් බාහිර වශයෙන් ආරූඪ කරගන්නක්ද නැතිනම් "ලස්සන" යන්න කිසියම් වස්තුවකට අයිති දෙයක්ද යනාදී කරුණු කෙරෙහි සන්නිවේදන දර්ශනයේදී අවධානය යොමු කරනු ලබයි.                           

                                         - ඉන්දික දිසානායක -